Updates Updates

Back

የካቲት 29/2012 ዓ.ም የሸገር ዳቦ ፋብሪካ የግንባታ ስራው ተጠናቆ የማሽን ተከላ ስራ በመከናወን ላይ ነው።

ከወራት በፊት ግንባታው የተጀመረው የሸገር ዳቦ ፋብሪካ የሲቪል ስራው የተጠናቀቀ ሲሆን በአሁኑ ወቅትም የማሽን ተከላ ስራ እየተከናወነ መሆኑን ኢ/ር ታከለ ተመልክተዋል ።

የዳቦ ማምረቻ የማሽን ተከላ ስራው  ከውጪ አገር ከመጡ የመስኩ  ባለሙያዎች እየተከናወነ እንደሚገኝ  እና የተለያዩ  ዘመናዊ ቴክኖሎጂዎች እየተገጠሙለት ይገኛል።

በተጨማሪም ፋብሪካው የሚያስፈልገውን የኤሌክትሪክ  ሀይል አቅርቦት ለሟሟላት የትራንስፎርመር  እና ሌሎች ግብዓቶች የግዢ ሂደት በቅርብ ቀናት ይጠናቀቃል ተብሏል ።

ከዳቦ ፋብሪካው ግንባታ ጎን ለጎንም የዱቄት ፋብሪካ ግንባታ ተጠናቆ የማሽን ተከላ ላይ ይገኛል።

ዳቦ ፋብሪካው በቅርቡ ስራውን የሚጀምር ሲሆን ምርቱን በሁሉም ክፍለ ከተማዎች የሚያሰራጩ ተሽከርካሪዎችም ተዘጋጅተዋል።

የዳቦ ምርቱን ለተጠቃሚዎች ለማድረስ ወጣቶች የተደራጁ ሲሆን ለመሸጫ የሚሆኑ አራት መቶ ከአገልግሎት ውጪ የነበሩ አንበሳ የከተማ አውቶብሶች ዝግጁ ተደርገዋል።

በከተማዋ የኑሮ ውድነትን ለመቆጣጠር የከተማ አስተዳደሪ የተለያዩ ፕሮጀክቶችን የነደፈ ሲሆን በቅርቡ ወደምርት ከሚገባው የዳቦ ፋብሪካ በተጨማሪ የዘይት ፋብሪካ ግንባታ እየተከናወነ ይገኛል።

ከዚህ ባለፈም ለነዋሪዎች የሚቀርቡ አትክልትና የሰብል ምርቶች የሚቆዩበት አምስት ማእከላት ግንባታ በከተማዋ አምስቱም በሮች ላይ በመገንባት ላይ ይገኛሉ።

እነዚህ ማእከላት በአርሶአደሮችና በተጠቃሚዎች መካከል ያሉ አላስፈላጊ ደላላዎችን ከገበያ በማስወጣት የዋጋ ንረቱን ለመቆጣጠር የሚያስችሉ ናቸው ተብሏል ።